Online Fraud in Mumbai : मुंबईत नोकरीच्या नावाखाली फसवणुकीचे प्रमाण वाढले आहे. चालू वर्षाच्या पहिल्या पाच महिन्यांत सुमारे १५० गुन्हे दाखल झाले आहेत. लोअर परळमधील एका तरुणाला जर्मनीतील नोकरीच्या नावाखाली आठ लाख रुपयांचा गंडा घातला. मालाडमध्ये एका तरुणाला बोटीवर नोकरी देण्याच्या नावाखाली दोन लाख रुपये उकळले.
मुंबई : चांगल्या पगाराची सरकारी नोकरी मिळवण्यासाठी प्रत्येक बेरोजगाराचा कायम प्रयत्न सुरू असतो. परिचयातील व्यक्ती, राजकीय नेते किंवा एखादे ॲप यावर पटकन विश्वास ठेवला जातो. नोकरीसाठी काहीही करण्याची तयारी असलेले बेरोजगार त्यांच्या आश्वासनांना बळी पडतात. मुंबईमध्ये चालू वर्षाच्या पहिल्या पाच महिन्यांत नोकरीच्या नावाने फसवणुकीचे सुमारे १५० गुन्हे दाखल करण्यात आले आहेत.
नोकरीच्या नावे आठ लाखांची फसवणूक
लोअर परळ येथील एक तरुण चांगल्या पगाराच्या नोकरीच्या शोधात होता. त्याच दरम्यान, नोकरी उपलब्ध करून देणाऱ्या एका ॲपच्या कार्यालयातून बोलत असल्याचे भासवून एका व्यक्तीने त्याला फोन केला. जर्मनी येथील एका कंपनीसाठी निवडण्यात आल्याचे सांगत, या व्यक्तीने जर्मनी येथील कंपनीतून मुलाखतीसाठी फोन येईल असे सांगितले. त्यानुसार त्याला एक फोन आला आणि त्यावरून तिघांनी या तरुणाची ऑनलाइन मुलाखत घेतली. मुलाखत घेणाऱ्यांनी तरुणाच्या क्षेत्राशी निगडित प्रश्न विचारल्याने तरुणाला तिघांच्या बोलण्यावर विश्वास बसला.
मुलाखत घेणाऱ्यांनी नोकरीपूर्वी काही प्रक्रिया पूर्ण करावी लागेल असे सांगून माहितीचे पत्रक पाठवले. त्यामध्ये प्रोजेक्ट सर्टिफिकेट फी, वैद्यकीय चाचणी, कागदपत्रांची पडताळणी, अनामत ठेव, वर्क फ्रॉम होमसाठी साहित्य अशा वेगवेगळ्या कारणांसाठी रक्कम भरावी लागेल असे नमूद करण्यात आले होते. नोकरीची आवश्यकता असल्याने या तरुणाने वेगवेगळ्या खात्यांवर सुमारे आठ लाख रुपये पाठवले. मात्र त्यानंतर काहीच प्रतिसाद न मिळाल्याने तरुणाने ई-मेलद्वारे संबंधित कंपनीशी संपर्क केला असता अशा प्रकारे मुलाखत किंवा पैसे कंपनीकडून स्वीकारले जात नसल्याचे सांगण्यात आले. या तरुणाच्या तक्रारीवरून याबाबत ना. म. जोशी मार्ग पोलिस ठाण्यात गुन्हा दाखल करण्यात आला आहे.
ॲपवर नोंदणीनंतर पैसे भरले, नंतर कार्यालय बंद
अन्य एका घटनेत, मालाडच्या दिंडोशी येथील एका तरुणाने नोकरी उपलब्ध करून देणाऱ्या ॲपवर नोंदणी केली. काही दिवसांनी त्याला बोटीवर नोकरी उपलब्ध असल्याचे कळविण्यात आले. कार्यालयात उपस्थित असलेल्या कर्मचारी आणि अधिकाऱ्यांनी त्याला सर्व प्रक्रिया समजावून सांगितली. नोकरी लागण्यापूर्वी किती आणि कशासाठी रक्कम द्यावी याबाबतही माहिती दिली. चांगल्या पगाराची नोकरी मिळत असल्याने तरुणाने तयारी दर्शवली आणि त्यांच्या सांगण्यानुसार सुमारे दोन लाख रुपये दिले. पैसे देऊन बराच कालावधी गेला तरी नोकरीचे काहीच न झाल्याने तरुणाने पुन्हा कार्यालय गाठले असता ते बंद आढळले. त्याच्यासोबत इतर अनेकांची अशी फसवणूक करण्यात आल्याचे समोर आले.
शिक्षिकेला फसवले
अंधेरीला राहणाऱ्या ३० वर्षीय शिक्षिकेने वांद्रे येथील एका वैद्यकीय महाविद्यालयात सहायक प्राध्यापिका या पदासाठी अर्ज केला होता. तिला एका अनोळखी व्यक्तीने फोन केला आणि वैद्यकीय महाविद्यालयात असिस्टंट प्रोफेसर म्हणून निवड झाल्याचे सांगितले. काही प्रक्रियेसाठी ७६ हजार रुपये जमा करावे लागतील, असे या व्यक्तीने सांगितले. शिक्षिकेने त्याला ऑनलाइन रक्कम पाठवली. याबाबत कॉलेजमध्ये जाऊन चौकशी केली असता अशी प्रक्रिया पैसे घेऊन केली जात नसल्याचे कर्मचाऱ्यांनी सांगितल्यानंतर तिला फसवणूक झाल्याचे लक्षात आले.
